انتشار الفيسبوك والمحتوى اللي عليه خلق نوع جديد من الصداقات مكنش موجود قبل كده، وبصراحة ما زلت مش عارف هل النوع ده يعتبر أصلا صداقة ولا ايه تعريفه بالظبط!!!
مجموعة من الناس ممكن تكون قابلتهم مرة ولا اتنين أو حتى ما قابلتهمش خالص ولسبب ما ضيفتهم على الفيسبوك، بس مع مرور الوقت لقيتهم بيشيروا حاجات حلوة بتعجبك كتير، ومش بتكلم على الحاجات المشهورة على الفيس وبتعجب أي حد، انا اقصد البوستات اللي هي ما بتعجبش غير خمسة ستة وانت واحد منهم، والعكس صحيح، انت كمان بتشير بوستات ما حدش بيفهمها، وتلاقي نفس الشخص ده بينبسط منها جدا.
بتبدأ تحس ان الشخص ده فيه حاجات كتير مشتركة بينك وبينه، وانه فاهمك الى حد كبير، وان لو اتقابلتوا في مكان شغل أو تحت أي ظرف طبيعي تاني غير الفيسبوك كنت ممكن تبقوا أعز صحاب، لكن هنا بتبان المشكلة، الموضوع بيفضل واقف عند الشعور ده، ومالوش حل تاني انه يتطور عن كده.
مش هينفع تمسك التليفون تتصل بيه مثلا تقولله ما تيجي ننزل مع بعض، هتيقى حاجة غريبة جدا. تخيل شخص ممكن تكون قابلته مره واحدة في حياتك ومن فترة طويلة، وفجأة تتصل بيه تقولله تعالى ننزل، مش منطقي للأسف.
الموضوع ده مش عارفله حل منطقي وللأسف الحالة دي بتفضل معلقة. تضل تتابع بوستاته وأفكاره وكلامه ومبسوط منها، كانه صاحبك، وفي الغالب هو كمان حاسس بكده، بس وبعدين؟!!! تتقابلوا في الشارع تبقى عايز تسلم عليه بحرارة وتفتح معاه حورات في الحاجات اللي بتعجبكم على الفيس، بس غرابة الموقف بتمنع كل ده.
ويظل الأمر على ما هو عليه، صداقة معلقة يربطها فقط الفيسبوك.